Burutu dute Erandiogoikoako San Jose auzoa berrurbanizatzeko lanen lehenengo fasea

Aitziber Oliban alkatea, egindako lanak azaltzen. © ERANDIOKO UDALA

San Jose auzoa berriztatzeko lanen lehenengo fasea amaitu da honezkero, eta emaitzaren berri eman du Udalak, Aitziber Oliban alkateak bertan egindako agerraldiaren bidez. Noranzko bi zituen bidea eraldatzea eta noranzko bakarreko bihurtzea izan da aldaketarik handiena. Bide horretara sarrera Goiko Lopertu Bidetik egingo da, eta irteera, berriz, aurretik zegoenari jarraipena ematen dion adar berri batetik. 

Iazko uztailaren 8an hasi zituzten gaur erakutsitako lanak. Alkateak azaldu duenez, noranzko bakarreko galtzada berriak hiru metroko zabalera du, eta oinezkoentzako guneak sortu dira albo banatan, gutxienez metro bi zabal diren espaloiak ipiniz. Zuhaitzak eta hiri-altzariak ere gehitu dira. 

Udalak adierazi duenez, "lehengo bidea ez zegoen egoera onean, zorua hondatuta zegoen lekua batzuetan eta saneamendu-sareak zaharkituta zeuden", besteak beste. Kale-argiak fatxadetatik kendu eta lurzoruan paratu dituzte, eta aparkaleku modura erabiltzeko asfaltatu eta atondu dute auzoko sarreran dagoen zelaia, jaietan barrakak hartzen dituena.

Amaitu berri den lanen lehenengo fase honek 378.000 euroko kostua izan du. Proiektu osorako aurrekontua milioi bi baino gehiagokoa da.

Erlazionatuak

Astelehenean hasiko dira berrurbanizatze-lanak Erandiogoikoan

Erandio

Erandiogoikoako San Jose auzoa berritzeko lanei hasiera emango diete uztailaren 8an. Denera bi milioi eurotik gorako kostua izango duen proiektu ha...