Tartangan eraikuntza-proiekturik egin ez dadila eskatzeko Udaletxearen aurrean batu dira 70en bat lagun gaur arratsaldean. "Egoera normal batean, gaur Tartangako zelaian egongo ginateke, suaren inguruan, azken urteetan bezala", adierazi dute, "eta egun berezi hau erabili nahi dugu datozen urteetan ere Tartangan sugarra inoiz itzal ez dadila aldarrikatzeko".
Erandioko hiri-eremuan dagoen berdegune bakanetako bat da Tartanga, eta aspalditik dago bertan ehunka etxe eraikitzeko asmoa, baita horren aurkako mugimendua ere, Tartanga Berdea plataformak bideratutakoa. Haren kideek gaurko ekitaldian adierazi dutenez, "koronabirusaren krisiak inoiz baino nabarmenago erakutsi du pertsonen zerbitzura dagoen hirigintza behar dugula".
"Hilabete hauetan, buelta bat ematean, berretsi ahal izan dugu pasealekurik eta aisialdirako tokirik ez dagoela, eta hirigintzan aldaketa integrala egin behar dela", esan dute. Azkenik, Tartangan etxebizitzak egiteko proiektua behin betiko gelditu dadila eskatu, eta datozen hilabeteetan euren aldarrikapenagaz lotutako hainbat ekimen abiaraziko dituztela iragarri dute.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
