Takolos irrati-klubak 25 kilo fideua prestatuko ditu dohaintzan emateko

Takolos taldeko partaideak maiatzean egindako taldearen urteurren-ospakizunean. © TAKOLOS IRRATI-KLUBA

Zapatuan, Takolos irrati-klubak 25 kilo fideua prestatuko ditu Astrabuduan, pobreziaren eta bazterketa sozialaren aurka lan egiten duen Aunar Elkarteari dohaintzan emateko.

Maiatzean, taldearen 20. urteurrenaren ospakizunean auzotarrek erositako tiketen diruari eta auzoko supermerkatu baten laguntzari esker, zapatu honetan, Takolos taldeko kideek amantala jantziko dute beste behin. Oraingoan, Astrabuduan elkartuko dira ongintzan emango dituzten 25 kilo fideua prestatzeko helburuagaz.

Kozinatutakoa Aunar Elkarteari emango diote dohaintzan, horrek gehien behar duten familien artean banatu dezan. Elkarte honek 2013tik egiten du lan bazterketa sozialean eta pobrezian dauden pertsonei laguntza ematen.

Ez da elkarregaz lan egiten duten lehen aldia; izan ere, martxoan hamabigarren Putxera Solidarioa ere antolatu zuten, eta, orduan, elkarte bien artean 380 errazio banatzea lortu zuten baliabide gutxiko familien artean.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun