Erandioko gasolinoak udan zehar egin dituen irteera gidatuek izan duten arrakasta ikusita, Udalak beste sei irteera antolatu ditu. Hala, itsasadarraren ondare kultural eta industriala ikuspegi paregabe horretatik ezagutzeko aukera egongo da abendura bitartean.
Erandioztarren artean izan duen harrera ona ikusita, eta mota horretako bidaiek duten eskaria kontutan izanda, Udalak beste sei irteera antolatzea erabaki du: azaroaren 6an eta 20an eta abenduaren 4an egingo dituzten irteerak Abra noranzkoan joango dira, eta, aldiz, azaroaren 13an eta 27an eta abenduaren 11n gasolinoa ibaian gora joango da San Anton zubira arte.
Irteeretan gidari batek azalpen elebidunak emango ditu itsasadarreko ondare industrial eta kulturalaren inguruan, Bilboko portuaren sorrera kontatuko du eta ibaiak Erandion izan duen eragina deskribatuko du, besteak beste.
Txangoetako edukiera 30 bidarikoa da eta izen-ematea turismoa@erandio.eus helbide elektronikoaren bitartez egin beharko da. Txartelen prezioa zazpi eurokoa izango da; 18 urtetik beherakoek hiru euro ordaindu beharko dituzte, eta lau urtetik beherakoek dohainik bidaiatu ahalko dira.
