Ernai gazte antolakundeak bere gain hartu ditu Barakaldon eta Erandion egindako gurutze frankisten aurkako erasoa: "Itsasadarraren bi aldeetako monumentu frankistak kenduta daude". Astelehenetik martitzenerako gauean, martxoaren 21tik 22ra, egin zuten Barakaldoko ikurraren aurkako ekintza, eta, horren aurretik, Erandiokoa ere suntsitu dutela adierazi dute. azpiamrratu dutenez, ekintza horren ondorioz Bizkaian ez da geratzen "monumentu frankista publikorik".
"Faxismoa indartzen eta 1978ko Espainiako erregimenean inpunitate osoz jarduten ari den estatuaren oinarri faxista" salatzeko eta borrokatzeko beharra ere aldarrikatu du Ernaik, "Euskal Herriaren memoria justu eta demokratikoa defendatzeko".
Halaber, ikur frankistak kaleetatik kentzeaz gain, erakundeen pasibotasuna ere salatu dute, eta, azken urteetan, Ondarroako, Lemoako Gantzabal mendi gaineko eta Buruntzako (Gipuzkoa) monumentu frankistak ere eraitsi dituztela gaineratu dute. Barakaldo eta Erandioko gurutzeen desagerpenagaz, Bizkaiko kaleetan horrelako ikurrik ez dela nabarmendu dute.
Gerra Zibilean, Cabo Quilates zamaontzia konfiskatu eta errepublikanoek nazionalentzako espetxe gisa erabili zuten. Matxinatuek Bilbo eta inguruko herrien aurka egindako bonbardaketen ondoren, herritarrek eta milizianoek Barakaldoko dartsenan zegoen itsasontziari eraso egin zioten, eta nazionalen alde egin zuten hainbat preso exekutatu zituzten. Erregimen frankistan horiek gogoratzeko gurutze bi eraiki zituen itsasadarreko ertzetan.
