Sinbolo frankistak geratzen dira Erandion, Getxon, Leioan eta Sopelan

Fatxada batetik kendutako plaka frankista bat. © GETXOKO UDALA

Uribe Kostako lau udalerritan ikusgai dago oraindino diktadura frankistaren sinbologia, estatu-kolpe falangistatik 80 urte pasa direnean. Eusko Jaurlaritzak jakinarazi duenez, Bizkaian 18 dira horrelako iruditeria duten udalak, tartean Erandio, Getxo, Leioa eta Sopela. Eskualdean aurkitutako objektu denak lehengo Etxebizitzaren Institutuko plakak dira. Jaurlaritzak horiek kentzeko laguntzak emango ditu.

Getxo da eskualdeko udalik aurreratuena, altxamendu militarra, Gerra Zibila eta diktadura frankistaren errepresioa goresten dituzten ezkutu, intsignia, plaka, busto edo oroitzapenezko bestelako objektu edo aipamenak kentzen. Gogora Memoriaren, Bizikidetzaren eta Giza Eskubideen Institutuaren arabera, Udalak 9 plaka kendu ditu 2015etik hona. Halere, oraindino etxebizitzetako 3 plaka geratzen dira, Gogorak egindako zenbaketari jarraiki. Udalak ekainean adierazi zuen "laster" kenduko zituztela.

Leioan, horrelako plakak identifikatu dituzte azken urte biotan eta orain horiek kentzea falta zaie. Sopelan, ostera, oraindino ez dute identifikazio-prozesua amaitu. Azkenik, Erandion, Udalak 22 auzokide-komunitateri eskatu zien baimena fatxadan eta atarian dituzten plaka frankistak kendu ahal izateko, Egokiñe Angulo zinegotziak joan den apirilean jakinarazi zuenez.

Bestalde, Gorlizek 2015eako otsailean iragarri zuen daborduko udalerrian ikur frankistarik ez zela. 2013an abiatu zuten frankismoa kaletik ezabatzeko kanpaina, Arantza Etxebarria alkate jeltzaleak auzokideei bidalitako gutun baten bidez.

Aurreko urteotan, udalek ez ezik herri-mugimenduek ere desagerrarazi dituzte ikur frankista asko. Besteak beste, Erromok Intsumisioa, Euskal Herrian Euskaraz, Ikasle Abertzaleak, Herri Norte Taldea, Itzubaltzeta Gaztetxea, Sare Antifaxista, Itzubaltzetako Txosna Batzordea, Jarrai, Segi eta Plaza Beltza eragileek horrelako ekintzetan parte hartu dute, Uribe Kostan.

Araban, Bizkaian eta Gipuzkoan sinbolo frankistak kentzeko, Jaurlaritzak 30.000 euro inbertituko du, Gogora Institutuaren bidez. Udalek eta Mankomunitateek eskatu ahal izango dute laguntza horiek; bakoitzak gehienez jota 7.000 euro jaso ahal izango du.

Eusko jaurlaritzak gogorarazi duenez, "sinbolo frankistak kentzea udalen eskumena da".

Erlazionatuak

Gerra Zibila eta diktadura goraipatzen zuten azkeneko ikurrak kendu dituzte Getxon

Getxo

Gerra Zibila eta diktadura garaiko azkeneko ikurrak kendu dituela jakinarazi du Getxoko Udalak, Espainiako Etxebizitza Erakundearen plakak, alegia....
Erandiok Gerra Zibileko eta bonbardaketen biktimak omentzeari ekin dio

Erandio

Pasa den martitzenean, apirilaren 25ean, omenaldia egin zieten Gerra Zibileko eta bondardaketen biktima izan ziren erandioztarrei. Plaka bat ipini ...
Sinbologia frankista Gorlizetik kanpo

Gorliz

Daborduko ez da Francoren garaiko plakarik ikusiko Gorlizko kaleetan, ezta etxebizitzetako atarietan ere; izan ere, auzotar guztiek gelditzen ziren...
Dozenaka sinbolo faxista kendu dituzte Itzubaltzetan

Erabiltzailearen aurpegia Getxo

Itzubaltzeta / Erromoko jaiak direla-eta Itzubaltzetako Txosna Batzordearen egitarauaren barruan Espainiako Etxebizitza Ministerioaren dozenaka pla...

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun