Gestamp Try Out enpresako langileak hilabeteak daroatzate bigarren mailako beharginak direla salatzen, eta, horren harira, Bilboko Lan Arloko epaitegiak ebatzi du Gestamp Tooling Erandiok egin duena legez kanpokoa dela, ELA sindikatuak jakinarazi duenez.
Lan Ikuskaritzak egindako txostenak zioen Gestamp Tooling Erandio eta Gestamp Try Out enpresetan langileen lagapen irregularra egiten ari zela, eta horixe ontzat hartu du epaiak. Hala, aldi baterako erregulazio espedientean dauden langile guztiak lanean hastea ahalbidetu beharko luke enpresak laster.
"Ez da azken asteetan enpresaren aurka eta langileen alde lortutako epai bakarra. Orain arte, lagapen irregularraren harira eskuratutako epai indibidual guztiek langileari ematen diote arrazoia, eta enpresari eskatzen diote arazoa konpon dezala", azaldu du sindikatuak. Hori horrela izan arren, baina, Gestampek lan-gatazkagaz epaitegietan jarraitzeko aldeko apustua egin duela deitoratu dute langileen bozeramaileek.
