Bi hautagaiek primarioen prozesuan parte hartzeko beharrezko abalak aurkeztu zituzten, baina, orain, hori amaitutzat eman da, Josean Perezek bere hautagaitzagaz jarraitzeari uko egin ostean. Horrenbestez, alderdiko iturriek azaldu dute ez dela egingo datorren domekarako aurreikusita zegoen bozketa-eguna.
"Nire nahia eta borondatea da Erandioko proiektu sozialistan parte hartzen jarraitzea, nire esperientzia eta gogoa batuz, ekarriz eta jarriz, eta talde berriagaz batera herriko bizilagunei ilusioa eta erantzuna emango dien proiektu bat bultzatzea", adierazi du Perezek prozesutik erretiratzean.
Horrela, Erandioko PSE-EEren zerrendaburu izendatu dute Jorge Gonzalez, 40 urteko Erandioko bizilaguna eta historian lizentziatua. Halaber, sozialistak Erandio hobea, erakargarriagoa eta bizilagunentzat zerbitzu hobeak eskaintzen dituen udalerria sortzen jarraitzeko Udalean egindako lana nabarmendu dute, eta arreta guztia herritarren funtsezko alderdian jarri dute.