Astika Herrian "azken egunera arte" geratuko direla ohartarazi dute

Ander Zarraga 2023ko mar. 9a, 12:34
Astika Herrian dagoen XVI. mendeko baserria, artxiboko irudian.

Aurreko martxoaren 3an, Bilboko epaitegi batek Erandion dagoen Astika Herria gune okupatuko kideei 30 eguneko epea ezarri zien eremua husteko. Horren aurrean, bertan bizi diren herritarrek iragarri dute ez dutela alde egiteko asmorik, eta elkartasuna sustatzeko ekintzak antolatuko dituztela.

Lurren jabea den Labartain S.L. enpresak Astika Herria osatzen duten hiru etxebizitzak, tartean XVI. mendeko baserriak, eta pabiloia eraisteko baimena jaso zuenetik, gune okupatua husteko mehatxua etengabea izan da. Azken mugarria Bilboko epaitegi batek jarri zuen martxoaren 3an, 30 eguneko epea ezarri baitzuen gune okupatua husteko. 

Bertan bizi direnek iragarri dute ez dutela joateko asmorik, eta nabarmendu dutenez, "gure esku dauden baliabideekin aurre egingo diegu eta azken egunera arte geratuko gara hemen".

"Labartain S.L. enpresak, Erandioko EAJ-ren ezinbesteko laguntzarekin, aurrera eraman nahi du proiektu txikitzailea, gaur egun hemen dauden zelai berde eta XVI. mendeko baserriak, lazeriaren eta porlanaren azpian estaltzeko", adierazi dute Astika Herrian bizi diren kideek.

Azaldu dutenez, epaitegiaren erabakiari helegitea jartzen saiatuko dira, bertan bizi diren pertsonak "erabat prekarizatuta gaudelako eta botatzen bagaituzte gure egoera okertuko delako". Hala ere, erabakia irmoa dela deitoratu dute eta, helegitea onartzea lortu arren, bertatik bota bezain pronto enpresak etxebizitzak eraitsiko ditu, "beraz ez dugu inora bueltatzeko aukerarik izango".

Elkartasunerako deia

Astika Herriaren aldeko elkartasuna sustatzeko ekintzak prestatuko dituztela ere iragarri dute, eta, horiek zehaztu ahala, sare sozialetan eta kaleetan jakinaraziko dituztela esan dute. Aurreratu dutenez, baliteke martxoaren 24an ekitaldia egitea; "Euskal Herriko indar bizi orori bihotzetan daramagun mundu berri horren alde borrokatzeko deia luzatzen diegu, adi mobilizazioetara".

Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun