Alderdiko arduradunek atzo hautagaiaren aurkezpenean azaldu zutenez, itxura berria eman gura diote politikari, eta horregatik egin dute ilusio eta interes handiko gazte baten aldeko apustua. Azpimarratu dutenez, Iribarren, gaztea izan arren, Bizkaiko PPko zuzendaritzako kide da, eta gaur egun Gazteriako idazkaria ere bada.
"Nire alderdikideen bide politikoa gertutik jarraitu dut, eta argi daukat, ahalegin eta dedikazio handiz, Erandioko bizilagunen bizitza hobetu dezakedala", adierazi du Erandioko alkategai Iribarrenek.
Halaber, hautagaiak azpimarratu du garrantzitsuena Erandion aldaketa politikoa lortzea dela, eta horretarako funtsezkoa dela gazteen aldeko apustua egitea, "ideia berriakaz eta egungo egoera politiko, sozial eta ekonomikoa hobetzeko gogo handiagaz baitaude".
Bukatzeko, Iribarrenek erandioztarren arazoak konpontzeko bere ibilbide-orria finkatu du udal-hauteskundeetara begira, auzotarren arazoak izango dituena erdigunean. Besteak beste, hauek azpimarratu zituen: tokiko eta kalitatezko merkataritza bultzatzea, delinkuentzia gutxitzea eta udalerrian aparkatzeko dauden arazoei irtenbidea ematea.