Orain, Erandioko Udalak eraikin historikoa berreskuratzeko proiektua egin gura duela iragarri du, zehaztuz du bere barrualdean kristalezko egitura bat jarri eta jarduera ekonomikoak garatzeko baliatuko dutela. Hasiera batean, udal-iturriek aurreratu dutenez, baliteke postprodukzio estudio bat jartzea bertan, baina berritze-lanak luzeak izango direnez, ez dute baztertu bestelako proiekturik garatzea.
Momentuz, gobernu-taldeak iragarri duenez, berritze-lanak luzeak izango dira, bere egitura legeak babestuta dagoelako. Alde batetik, egitura egonkortuko dute, eta, horren ostean, desnibeletarako irtenbide bat bilatu gura dutela azaldu dute, eskailerakaz edo igogailua bategaz egingo litzatekeena.
"Dorrearen azterketa arkeologikoa eta historikoa egiten zen bitartean, ekintza nagusi bi egin genituen: batetik, jendeak dorrea ezagutzeko eta erabilerari buruzko bere iritzia emateko bisita gidatuak; eta, bestetik, aholkularitza-batzorde bat eratu genuen, bizilagunek eta inguruko erakundeek osatua", azaldu du Adrian Busto Erandioko Udaleko kultura zinegotziak. Bere aldetik, Aitziber Oliban alkateak eraikin historikoaren garrantzia azpimarratu eta Erandion "balio handieneko eraikina" dela adierazi du.