Irail honetan, Gautxoriak Erandio kultur elkarteak hirugarren urtez antolatu du Eureka Domeka! kultur zikloa. Beste behin, euskaraz, kalitateari erreparatuz eta formatu txikian antolatutako emanaldiak egin dituzte Altzagako moilan, baina irailaren akabuagaz batera, aurtengo azken ikuskizunak eskainiko dituzte domeka honetan. Bien bitartean, iraileko domeketako arratsaldeek utzitako irudi batzuk dakarzkizuegu.
Aurtengo Eureka Domeka! zikloa handikiro amaituko dute Gautxoriak Erandiokoek; izan ere, domekan, hilaren 24an, erraldoiz eta kilikiz beteko dituzte Altzagako kaleak, 12:00etatik aurrera, eta, arrastian, 18:00etan, Eñaut Elorrieta musikari handiak emanaldia eskainiko du moilan.
Marrazketa inprobisatua, poesia, musika eta festetako ikur diren erraldoiak eta kilikiak dakartzan ekimena udalerriko kultur eskaintzaren nahitaezko hitzordua bilakatu da erandioztarrentzat. Horren erakusgarri dira iraileko domeketan moilan edo, euria egin duenean, merkatu zaharrean bildu diren herritarren kopurua.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
