Altzagako Ategorri auzoan jarri duten igogailua Erandioko lehen hiri-igogailua da, eta Gernika eta Bereterretxe kaleen arteko 5,5 metroko altuera gainditzeko balioko du. Lanak 2022an bukatu zituzten, baina bizilagunen erkidegoen arteko akordio baten mende zegoen, martxan jartzeko. Halakorik ez zenez gertatu, prozesua asko luzatu da eta Udalak bere gain hartu behar izan du auzia, "bizilagunen eskari historiko bati erantzuna emateko aukera ematen duen egitura funtzionamenduan jartzeko". Lanek 150.000 eurotik gorako aurrekontua izan dute, eta horietako 100.000 Eusko Jaurlaritzak jarri zituen.
"Neurri honegaz irisgarritasuna hobetzen da, bereziki adinekoentzat, eta ibilbide irisgarri bat sortzen da Gernika eta Bereterretxe kaleen eta etxebizitza-multzoaren barruko bideen arteko elkargunearen artean", azaldu dute Udaletik.
