Altzagako ikastetxeak Brontzezko A Kudeaketa Aurreratuaren Euskal Sari ospetsua jaso du. Sari hori Eusko Jaurlaritzak ematen du EUSKALITen bitartez, eta bere kudeaketa-sistemak hobetzeko konpromisoa duten Euskadiko erakundeak nabarmentzen ditu. Ekitaldia abenduaren 11n izango da, Bilboko Euskalduna Jauregian.
Sari hori zentroaren kudeaketa metodologiko eta estrategikoaren aintzatespena dela azpimarratu dute zentroko arduradunek; izan ere, aurretik, STEAM Euskadi 2023 Saria ere jaso zuen. EUSKALITek Jado Elkargoa ebaluatu du, eta azpimarratu du "hedapen-maila handia" duela kudeaketa-ereduan, taldearen inplikazioa eta komunitatearekiko arretan; azpimarratu dutenez, alderdi horiek funtsezkoak dira erakundeak arrakasta izan dezan. Ebaluatzaileen txostenaren arabera, ikastetxea "hobekuntzarekiko oso harkorra" da eta "bezeroekin, ikasleekin eta familiekin" lan egiteaz harro dago.
Azaldu dutenez, aitorpen hori emateko, EUSKALITeko Ebaluazio Klubak Jado Elkargoaren Kudeaketa Aurreratuko KAE ereduaren azterketa zehatza egin zuen. Txostenean, zuzendaritza-taldearen eta estrategia-taldearen konpromisoa nabarmentzen da, bai eta lantaldeena ere. Talde horietan, langile askok lidergo-funtzioak hartzen dituztela aipatu dute eta motibazio handia erakutziz. Ebaluatzaileek adierazi dutenez, ikastetxeak lankidetza-kudeaketako egitura sendoa du, eta bertan modu aktiboan parte hartzen dute hezitzaileek, ikasleek eta familiek, ingurune parte-hartzailea eta erantzukizun partekatukoa sustatuz.
Euskadiko kudeaketa aurreratuaren aitorpena
Kudeaketa Aurreratuaren Euskal Saria erakundeetan kudeaketa aurreratuaren garrantzia sustatzeko helburuagaz sortu zen, lehiakortasunerako eta eraginkortasunerako gako gisa. 1.500 zuzendari eta teknikari baino gehiagogaz, EUSKALITeko Ebaluazio Klubak modu altruistan egiten du azterketa hori, erakunde bakoitzaren lorpenak ebaluatzeko eta aitortzeko irizpide objektibo eta sistematikoak biltzen dituen Kudeaketa Aurreratuko erreferentzia-eredu bat aplikatuz.
