Espainiako bandera ez dute Erandioko udaletxearen balkoi nagusian esekiko. Hala erabaki zuen atzo Udalaren osoko bilkurak, PPk aurkeztutako mozioa ezeztatu eta gero. Horrela geratu ziren bozak: PP (1) eta PSE (4) baiezkoak; EAJ (8) eta EHBildu (6) ezezkoak eta Elkarrekin Podemos (2) abstentzioa. Erabakiaren aurrean, PPk 15 eguneko ultimatuma eman dio gobernu-taldeari, bestela gaia auzitara eramateko mehatxua egin du.
Mobilizaziorako deia
Arrastian, 19:30ean hainbat ikurrinagaz elkarretaratzea egin zuten herritarrek erabakia txalotu zuten eta inposizioen aurrean, "herritarren mobilizazioa eta erantzun kolektiboa" aldarrikatu zituzten.
"Gure herriak erabakitzeko eskubidea du, eta horretarako aurrerapausoak ematen jarraituko dugu. Gure borondatea libreki adierazteko eskubidea errespetatu behar da, eta inongo botere zentralek ez digute hori ukatu behar. Ez dugu inposiziorik onartuko", erantsi dute deialdia egin zuten herritarrek.
Era berean, elkarretaratzea deitu zuten eragileek gogoratu zuten hurrengo eguenean, martxoaren 6an, Gure Eskuk aurkezpena egingo duela Merkatu Zaharrean, ekainaren 7an egingo duten mobilizazio erraldoia iragartzeko, eta herritarrei horretan ere parte hartzeko gonbitea egin diete.
