Aurtengo Udalaren aurrekontua hiru kudeaketa-arlo handitan banatu da: Antolaketa, 5.860.966 eurogaz; Lurralde Garapena, 13.345.288 eurogaz; eta Herritarrak, zati handiena jaso duena, 23.825.745 euro izango ditu, gizarte-zerbitzuak, hezkuntza, kultura eta kirola lehenetsiz.
Diru-sarrera arrunten gehikuntza, 1.914.685 eurokoa izan dena, funtsezko zerbitzuak hobetzeko erabiliko dutela iragarri dute, hala nola parkeak eta lorategiak, mugikortasun-plana, hondakinen bilketa eta tratamendua, kale-garbiketa eta energia-eraginkortasuna argiterian eta eraikin publikoetan, besteak beste. Halaber, medikuntza- eta kirol-zerbitzuak indartu gura dituzte azkenaldian zeresana eman duen San Jose egoitzarako partida espezifikoakaz, udal-kiroldegian kontratazio berriakaz, Bizkai Bizi programagaz eta ohitura osasungarriak sustatzeko ume eta gazteentzako jarduerakaz. Udalerrian dauden hezkuntza-, kultura-, kirol-, gizarte- eta gazte-programak aurreko ekitaldietako intentsitate beragaz mantenduko dituztela ere aurreratu dute.
Azaldu dutenez, kapital-sarrerak 431.315 euro igo dira, eta, horri esker, 2.350.000 euro baino gehiagoko inbertsioak egin ahal izan dituzte. Jarduera garrantzitsuenen artean honako hauek zerrendatu dituzte: saneamendurako lursailak erostea, Hiri Antolamenduko Plan Orokorra garatzea, ikastetxeetan hobekuntzak egitea, udal-eraikinetan eguzki-plakak jartzea, turismoa sustatzeko ekintzak, kultura- eta kirol-ekipamenduak erostea, Udaltzaingoan hobekuntzak egitea, parkeak, lorategiak eta argiteria publikoa birgaitzea, zoladura-obrak eta adinekoentzako programa espezifikoak.