Aurreikusitako jarduketen artean, Plaiabarri bidea egitea dago, sektore berrirako sarbidea izango duena, bai eta Arriaga-Sakoni bidea egokitzea eta BI-735 foru-errepidearekiko elkargunea egitea ere. Gainera, lurzorua deskontaminatzeko lanak egiteagaz batera, lorategiak ere jarriko dituztela iragarri dute, ingurune bizigarriagoa eta iraunkorragoa sortzeko asmoagaz.
Halaber, arduradunek iragarri dutenez, Euskal Trenbide Sarearen kotxetegi berriek 17.140 metro koadroko partzela bat hartuko dute Arriagako tunelaren ondoan, eta 20 tren unitate ingurutarako edukiera izango dute. Nabe nagusiak 150 metroko luzera, 46 metroko zabalera eta 12 metroko altuera izango ditu, eta erabilera anitzeko eraikin bat, pilaketa-eremu bat, langileentzako aparkaleku bat eta unitateak garbitzeko eta mantentzeko erantsitako bide bat izango ditu. Gordelekuak 11 trenbide izango ditu, eta lotura bi Lutxana-Lezama linea nagusiagaz.
Proiektuaren guztizko kostu zenbatetsia 11,34 milioi eurokoa izango da, BEZik gabe; zenbateko hori ETSk eta SPRILUR-ek erdibana finantzatuko dute. Plan estrategiko hori erakundeen arteko lankidetzaren aldeko apustua dela azpimarratu dute erakunde bultzatzaileetako arduradunek, hiri-berroneratzea, tokiko garapen ekonomikoa eta Bilboko trenbide-konektibitatea hobetzeko, hain zuzen ere.
