Erandioko Udalak jakinarazi duenez, orain arte 520 zehapen-proposamen erregistratu dituzte bide publikoan alkohola kontsumitzeagatik, 61 trafiko-salaketa, 18 kalean pixa egiteagatik, eta 64 zehapen-espediente ireki dituzte drogak kontsumitzeagatik edo edukitzeagatik, arma zuriak eramateagatik eta agintearekiko errespetu faltagatik edo desobedientziagatik.
Gainera, poliziak zazpi eginbide judizial bideratu ditu, besteak beste, alkoholemia positiboagatik, droga-trafikoagatik eta zitazio judizialengatik, eta lau atxiloketa ere egin ditu errekisitoria judizialengatik, agintaritzaren aurkako atentatuagatik eta estupefazienteakaz lotutako delituengatik.
Plana ekainaren amaierara arte luzatuko dutela iragarri dute, dantzalekuaren udako itxierara arte, eta kriminaltasuna murrizteko, eremu publikoetan alkohol-kontsumoa prebenitzeko eta udalerrian segurtasun-pertzepzioa hobetzeko udal-estrategia baten parte dela ere azaldu dute.
Udalak ziurtatu duenez, Eusko Jaurlaritzako Segurtasun Sailak baterako operatibo horiei jarraipena emateko konpromisoa ere hartu du; izan ere, diskotekarako sarbideetan alkoholaren eta drogen kontsumoa detektatzeko trafiko-kontrolak ere egiten dituzte.
Toki-administraziotik azpimarratu dutenez, hedapen horrek gizalegearen aurkako portaeretan disuasio-eragina izan du, eta aste-akabuetan gazteen kontzentrazio handieneko puntuetako batean bizikidetza eta herritarren segurtasuna hobetzea ahalbidetu du.
