CSICen txostenak dioenez, airean dauden mikro-partikulen eta metal astunen kontzentrazioa oso handia da zenbait gunetan. Zehazki, Asua aldean neurtutako balioak Madril bezalako hiri handietako batez bestekoak baino hamar aldiz handiagoak dira. Gainera, dokumentuak ohartarazten du kutsadura hori inguruko auzoetara ere zabal litekeela.
Udalak, ordea, lasaitasun mezua zabaldu du. Tokiko agintarien esanetan, orain arte jasotako datuak Europako araudiak osasuna babesteko ezarritako mugen barruan daude. Horrez gain, gogorarazi dute Erandio EAEko udalerririk kontrolatuenetarikoa dela airearen kalitateari dagokionez, Eusko Jaurlaritzaren sareko bi neurketa-estazio finko baititu.
Era berean, Udalaren arabera, airearen kalitatea etengabe neurtzen da, eta jarduteko protokolo argiak daude ezarrita. Horien helburua da osasunerako arriskua izan dezakeen edozein egoera antzemanez gero, herritarrei berehala jakinaraztea.
Hala ere, CSICen txostena eskatu zuten auzo-elkarteei erantzunez, Udalak adierazi du dokumentua sakon aztertuko duela. Horretarako, Ingurumen zein Osasun eta Eraldaketa Digitaleko Sailekaz bilera egingo dute, txostenak jasotzen dituen datuak aztertzeko.
