Erandioko Aparkalekua Konponbidea Koordinakundeak ohar bidez erantzun die Aitziber Oliban alkateak bidalitako idatziei. Adierazi dutenez, herritarrek idatziak banaka bidali badituzte ere, ekimena talde baten hausnarketaren emaitza dela. Auzotarren hitzetan, Udalak emandako azalpenek ez dute "mezu lasaigarririk" eskaintzen; aitzitik, udal-gobernuak auzokideen kezkari garrantzia kendu eta haien argudioak "subjektibotzat" jo dituela deitoratu dute.
Koordinakundeak gogorarazi du alkateak berak 2025eko azaroko osoko bilkuran onartu zuela TAO sistemak ez duela aparkaleku berririk sortuko herrian eta bere helburua "auto batzuk kentzea" dela. Herritarren taldearentzat, horrek agerian uzten du Udalak ez duela epe laburreko zein luzeko planik lehendik ere larria den arazoarentzat.
Era berean, salatu dutenez, datozen bi urteetan Altzagako azoka egiten den aparkalekua eta CAESAko behin-behineko aparkalekua desagertu egingo dira. Horri gehitu behar zaio Hiri Mugikortasun Iraunkorrerako Planak aurreikusten duena: Astrabuduko eta Altzagako egungo aparkalekuen % 50 gutxienez ezabatzea.
"Hemendik 3-4 urtera egoera askoz okerragoa izango da gobernu-taldearen aurreikuspen falta kontuan hartuta", ohartarazi du koordinakundeak. Taldearen ustez, arazoa konpondu beharrean, Udalaren kudeaketak larriagotu egingo du egoera, ez baitago etorkizuneko proiektu sendorik mahai gainean.
Egoera honen aurrean, Aparkalekua Konponbidea koordinakundeak iragarri du lanean eta bizilagunak kontzientziatzen jarraituko duela. Haien helburua honela laburbildu dute: Erandioko Udalarik irtenbide iraunkorrak biltzen dituen plan integral bat diseinatu eta gauza dezala exijitzea, auzokideen mugikortasun eta aparkatze beharrak bermatzeko.
