Azpiegitura horrek kezka handia piztu zuen auzotarren artean. 15 metro inguruko dorrea, erabilerarik gabea, higadura eta korrosio zantzuakaz zegoen, eta jolasgune baten, ohiko igarobide baten eta aparkalekuaren ondoan kokatuta egoteak arriskua areagotzen zuela salatu zuten. Egoera horren aurrean, Erandio Bizirik plataformak Udalari eskatu zion egitura kentzeko, "beharrezkoa ez den arriskua" sortzen zuela iritzita.
Udalak, bere aldetik, adierazi zuen ez zegoela berehalako erortze arriskurik, baina, hala ere, dorrea desmuntatzeko eskatu zion lanen ardura zuen enpresari, segurtasuna bermatzeko asmoz. Azkenean, esku-hartzea gauzatu da, eta horrek ahalbidetu du aparkalekua berriro irekitzea.
Eremu horrek, gainera, garrantzi berezia du auzoarentzat. Izan ere, CAESAren lursail ohian kokatutako aparkalekuak 300 ibilgailu ingururentzat lekua eskaintzen du, eta duela ia urtebete jarri zen martxan Altzagako aparkaleku faltari erantzuteko.
Esku-hartzea aprobetxatuta, sarreran galibo bat ere jarri dute; hemendik aurrera, 2,20 metrotik gorako ibilgailuek ezingo dute sartu.
Bestalde, dorrea kentzeak eremuaren etorkizuna berriro mahai gainean jarri du. Lursailak gaur egun Viuda de Sanz enpresaren esku daude, eta bertan 350 etxebizitza baino gehiagoko hiri-berroneratze proiektua aurreikusten da, espazio publiko eta jarduera ekonomikorako gune berriakaz batera.
