Panamako Ministerio Publikoak baieztatu du Bocas del Toroko Fiskaltzak bi akusatuen erantzukizun penala frogatzea lortu duela ahozko epaiketan, 2024ko uztailaren 23an Isla Careneron gertatutakoengatik. Eneritz Argintxona Erdialdeko Amerikan bidaiatzen ari zen Bocas del Torora heldu zenean, Panamako helmuga turistiko ezagunenetako batera.
Gaztea Isla Careneroko ostatu batean zegoen, eta uztailaren 23ko arrastian ikusi zuten azkenekoz bizirik. Harremana galdu ostean, senideek eta lagunek desagerpena salatu zuten, eta bilaketa-operatibo zabala abiatu zuten Poliziak, Babes Zibileko zerbitzuek, Fiskaltzako langileek eta boluntarioek.
Handik hiru egunera, uztailaren 26an, inguruko bizilagunek gorpu bat aurkitu zutela jakinarazi zieten agintariei, Isla Careneroko hondartza batean. Fiskaltzak gero baieztatu zuen Eneritz Argintxona zela, senideen laguntzagaz egindako ADN proben bidez. Autopsiaren arabera, heriotzaren arrazoia garezurreko traumatismoa izan zen, eta hasieratik baztertu zuten istripuaren hipotesia.
Erruduntasun-adierazpenagaz, auzia azken fasera igaro da orain. Panamako justiziak zehaztu beharko du bi kondenatuek zenbateko espetxe-zigorra bete beharko duten hilketa eta lapurreta delituengatik.
