Getxoko Udaltzaingoak ez ditu grabazio-kamera gehiago aurkitu Algortako Fadura kiroldegiko nesken aldageletan. Hala azaldu du Udalak, atzo hasitako ikerketa amaitu eta gero. Itzubaltzeta/Romoko Gobela kiroldegia ere arakatu dute, eta ez dute kamerarik aurkitu. Halaber, Getxoko Udaltzaingoa atzo aurkitutako legez kanpoko kameren grabazioetan agertzen diren pertsonakaz harremanetan jartzen hasi da. Azaldu dutenez, "talde txikia da", atletismo eta errugbi taldeen neskentzako aldageletan aurkitutako kameren grabazioetan agertzen dena. Bien bitartean, Udaltzaingoak zabaldutako ikerketan aurreikusitako eginbideakaz jarraitzen dute.
Getxoko Udalak bere "haserrea eta gaitzespena" adierazi ditu berriro ere, eta, horrez gainera, lasaitasunera deitu ditu herritarrak, udal kirol instalazioetako aldageletan ez baita inolako grabagailu gehiagorik aurkitu. Halaber, berriro azpimarratu du "muturreraino" joko duela, bai polizia-ikerketagaz bai horrek ekar dezakeen edozelako jarduerakaz ere.
Getxo Kirolak-ek, bere kirol guneetako neskentzako aldageletan grabazio gailu gehiago ez dagoela egiaztatu ondoren bere instalazio guztiak aztertu ditu. Halaber, aldizkako azterketak egiteko asmoa berretsi du legez kanpo ipini daitezken kamerak aurkitzeko.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
