Zaldizkorik trebeenek hitzordua zuten aste-akabu honetan Getxoko Galea zaldi-klubean. Izan ere, zapatuan eta domekan, hilak 16 eta 17, bertan jokatzekoa zen Euskadiko Oztopo-jauziko Txapelketaren proba bat. Baina gaur bertan Euskal Hipika Federazioak jakinarazi du proba “bertan behera” geratuko dela, “aurreikuspen meteorologikoak” direla-eta. Hala ere, Federazioko kideek HIRUKAri azaldu diotenez oraindino ez dakite proba ez den egingo ala beste data batera atzeratuko duten, “horrelako kasuetan egiten ohi den eran”.
Ostera, denboraldi honetako egutegi estuak ez du kontua erraz ipiniko. Proba behin betiko bertan behera geratzekotan, orain arte izena eman dutenek inskripzioaren dirua berreskuratzea eskatu beharko lukete Galea zaldi-klubean. Bigarren kasua izatekotan, inskripzioa egiteko aukera luzatuko luke Federazioak bere webgunean eta ordaindu Galean egin beharko lukete zaldizkoek, modalitateen arabera 20 eta 60 euro bitartean.
Txapelketan hamabi proba aurreikusita zeuden, egun bakoitzeko seina. Zapatuan zein domekan, zaldiek honako altueretako oztopoei egin beharko liekete aurre: 50, 80, 100, 110, 120 eta 130 zentimetro.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.