Joan den aste-akabuan Getxon baimendutako alkohol-tasa gaindituta gidatzea egotzita atxilotuetako bat Ertzaintzako kidea da. "El Correo" egunkariak argitaratu duenez, gainera, "atxilotutako ertzainak auto ofizialetako bat gidatzen ari zen". Atxiloketa zapatuan, hilak 20, jazo zen, 04:30ean. Udaltzainek autoa gelditzeko agindu zioten, alkohol-proba egiteko. Gidariak, 54 urteko gizonezkoak, 0,88 mg/l eman zuen, Polizia-iturrien arabera; hau da, baimendutako tasa baino hiru aldiz gehiago.
Ertzaintzak jakinarazi duenez, egindako atestatua epaitegian dago. Hala, prozesu judiziala amaitzean, Ertzaintzak berak dagokion barne-espedientea bideratuko du. El Correok aipatutakoaren arabera, Eusko Jaurlaritzako Segurtasun Saileko iturriak aipatuta, "Barne Gaien Unitateak bi gaien inguruko ikerketa abiatuko du: bata, ustez alkoholaren eraginpean gidatzeagatik; eta bestea Ertzaintzaren autoetako bat 'txarto' erabiltzeagatik. Hori baieztatzekotan, espedientatu eta berriro zigortuko dute".
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
