Halandaze, Fadura kiroldegiko kanpoaldearen erabilera aldatuko da, hain zuzen ere, "Gobela ibaia bideratzeko obrek kiroldegi inguruan izan duten eraginagatik eta instalazioak gaur egungo kirol-eskariei egokitzeko hausnarketa-aldi bat hasteko beharragatik", Kirol Arlotik nabarmendu dutenez. Horretarako, Getxo Kirolak erakundeak partaidetza-prozesu bat hasiko du. Bertan, parte hartzeko aukera izango dute kirol-klubek, elkarteek eta kiroldegietako erabiltzaileek.
Alvaro Gonzalez Getxoko Kirol zinegotziaren iritziz, "Gobela ibaia zabaltzeko obrak inpaktu handia sortzen dabiltza Fadura inguruan eta, beraz, aurrerantzean izango dugun eremua ahal bezainbeste nola aprobetxatu planteatu behar dugu, kontuan hartuta kiroldegiko erabilera-tasak oso handiak direla".
Eraldaketa hori koordinatzeko, Getxo Kirolak-ek pertsona bat kontratatu du aldi baterako, hautaketa-prozesuan aurkeztu ziren zazpi hautagaien artean.
Bitartean, Getxo Kirolak eta Erandioko Martiartu Kluba ados jarri dira, golf-instalazioetarako zuten akordioa padel-pistetara zabaltzeko. Hala, Faduran Gobela ibaia kanalizatzeko obren eraginez eraitsitako pisten erabiltzaileek Erandion jokatu ahal izango dute.
