Begoñako galerien balioa nabarmentzeko milioi bat euroko kreditu gehigarria onartu zuen atzo Getxoko Udalbatzak. Diru hori Udalak EHUgaz daukan hitzarmenera bideratuko dute, 2016-2018 denboraldirako. Osoko bilkuraren puntu honek PPren aurkako botoak bakarrik jaso zituen, uste baitute obrak Udalaren baliabide publiko "gehiegi bereganatzen" dituela, "gero emaitza eskasak izateko". GUK eta Ciudadanos abstenitu egin ziren; gainerako taldeek aldeko botoa eman zuten.
Joseba Arregi Hirigintzako zinegotziak zenbait datu eman zituen EHUgaz sinatutako hitzarmenaren emaitzei buruz. Hala, datozen ekintzetako batzuk aipatu zituen eta ziurtatu zuen galerien balioa nabarmentzeko plana (gaur arte 5.289 pertsonak bisitatu dituzte) Zientzia, Teknologia eta Berrikuntzako Euskadiko 2020ko Planean dauden 50 ekintzetako bat dela (zehazki, kultur eta josteta industrien atalean).
Atzoko saioan ere, 32.890 euroko kreditu gehigarri bat onartu zen, CECOBI Bizkaiko Komertzioaren Konfederazioarentzako diru-laguntza gisa, "Bizkaia Digital Market" delako merkataritza elektronikoko plataforma ezartzeko.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
