Amaia Agirrek aipatu duenez, urtarrilaren 21ean egin zen azken saioaren ondoren, proposamen horiek denak hainbat kontzepturen arabera banatu dira. Benta eraikina balio anitzeko gune barneratzailea eta belaunaldien artekoa sortzea da helburua; malgutasuna eskainiko duena bertan ezaguera eta esperientziak partekatu ahal izateko. Prozesuan parte hartu duten pertsonek hauxe eskatu dute: "Guneak auzoaren identitate balioak erakutsi behar ditu, batez ere euskara eta lehen sektorearekiko harremana". Gainera, pertsonak elkartzeko erakargarria izateko, eskatzen dute igarobide soil bat ez izatea. "Tabernako barra mantendu eta jarduerak eskaini beharko lituzke, beti ikuspuntu sozial batetik".
Orain, gogorarazi du Agirrek, tekniko batek aztertu beharko du proposamenen bideragarritasuna eta eraikinaren egokitzapena dagokion aurrekontuaren gastu-partida onartzeak baldintzatuko du.
Bigarren fasea abian da
Lehenengo fasea bukatu ostean, Udalak lanean dabil proiektua "errealitate bihur dadin". Bigarren fase horretan, diseinatuko da gunea kudeatzeko inplikatutako agenteek Udalagaz eta herritarrakaz izango duten harreman-eredua.
#BentaraNoa ekimena Getxoko Udalaren Gobernu Irekiaren jardueran kokatuta dago eta horren helburu nagusia da "erakundea herritarrengana hurbiltzea eta herritarren eta Udalaren arteko elkarlana sustatzea, bizi-kalitatea eta gure udalerriaren kudeaketa hobetze aldera" dio zinegotziak.
Topagune eta dinamika guztiek aztarna zabala eta gardena uzten jarraituko dute www.getxo.eus webgunean eta Facebook, Twitter (#BentaraNoa traola)… sare sozialetan.
BentaraNoa
#BentaraNoa prozesu parte-hartzailea Getxoko Udaleko Komunikazioak, Herritarren Partaidetzak eta Gardentasun Arloak sustatzen dute. Horren bitartez, proposamen berriak entzun eta alderatuko dira Getxoko Andra Mari auzoan dagoen eta jada erabiltzen ez den Benta eraikina berriz ere erabiltzeko.
#Bentaranoa proiektuaren bitartez, Udalak Getxoko herritarrak gonbidatu zituen –udalerriko auzokideak, lekuaren historiarekin lotuta zeuden pertsonak, elkarteak, agente sozialak eta enpresakoak, besteak beste- beraien jakituria partekatu zezaten galdera egokiak eginez, eta espazio ezberdinetan egingo diren (aurrez aurrekoak eta digitalak) topaketa eta elkarrizketetan parte hartuz. "Herritarrei eskatu diegu gu hartzea, entzutea eta proposamena ulertzea, parte har dezaten eta euren ideiak konta ditzaten. Eta, benetan, azpimarratzekoa da izandako parte-hartzea", nabarmendu du Amaia Agirrek.
