Olatuz Olatu programari ekin dio Getxoko Udalak, daborduko

Belaontziak, artxiboko irudian. © GETXOKO UDALA

Getxo Kirolak udal-erakundea hasi da beharrean uretako kirolakaz lotutako bertoko klubakaz, Europar Batasunak sustatutako Olatuz Olatu (WoW, ingelesez) programa garatzeko. Ekimen horretan, Getxogaz batera, EBko honako hiriak dabiltza modu koordinatuan lan egiten: Pesaro (Italia), Gdynia (Polonia), Stropkov (Eslovakia), Nancy (Frantzia) eta Dubrovnik (Kroazia). Sei udalerriek talde eragile bat eratu dute, Italiako Pesaro hirian pasa den martxoan egin zuten bileraren ondoren.

Olatuz Olatu ekimena Europar Batasuneko Erasmus+ Sport atalaren barruan dago. Bertan, hainbat kirol-modalitateko klubek parte hartuko dute, bela, piraguismo, arraun eta urpekaritzakoak, alegia. Modalitate horiek aukeratu dituzte, aipatutako klubek dituztelako Getxogaz batera proiektuan diharduten hirien antzeko eskaintzak. Proiektuak aurrera egin ahala, helburua da interesa duten gainontzeko ur-modalitateak barne hartzea.

Ur-kirolak sustatzeaz gainera, bi izan ziren Pesaron adostutako helburu orokorrak, biak Getxoko uretako klubek berretsi dituztenak: lekuko erkidego nautiko bat sortzea, ikastetxeen, kirol-kluben eta itsas inguruagaz lotutako erakundeen parte hartzeagaz; eta Getxo kostaldeko erreferentziazko udalerri gisa kokatzea.

Getxon nazioarteko campus egingo dute abuztuan, proiektuan inplikatutako kirol-klubetako gazteakaz. Modu berean, laneko egutegiaren arabera, laster Nancyn egingo dute beste lan-saio bat . Bertan, garatzen dabiltzan lekuan lekuko behar guztiak partekatuko dituzte.

Europako Olatuz Olatu programak, denera, 500.000 euro inguruko aurrekontua dauka; horretatik, Getxok ia 100.000 euro kudeatuko ditu. Programa ezagutzeko wowgetxo@gmail.com helbidera jo.

Erlazionatuak

Getxok uretako kirolak sustatzeko Europako programa batean parte hartuko du

Getxo

Getxoko Udalak Europako Erasmus+ Sport programan parte hartuko du urte biz, uretako kirolak sustatzeko asmoz. Programak Europako Batasunaren diru-l...