Kultura  Getxo 2017-07-19 12:48

Areetarren txanda!

Areetako Santa Ana auzoa festaz jantziko da uztailaren 21etik 23ra bitartean. Hala, egun horietan, auzokide denentzako hamaika aukera egongo da, ume, gazte zein nagusientzat. Barikuan, uztailaren 21ean, emango diete hasiera Santa Anako jaiei. Arrastiko 07:00etan izango da txupinazioa, hala ere, hori baino lehenago, inguruko neska-mutilak 17:00etan hasiko den Txikigunean jolastu ahal izango dira.

Areetarren txanda!
Paella-lehiaketa egingo dute domekan, hilaren 23an. | Ikusi handiago | Argazki originala

Suziria amatatu bezain pronto, buruhandiak kalerik kale ibiliko dira, han eta hemen harrapatuko dituztenak astintzeko asmoz. Iluntzeko 08:30ean sardina-janagaz tripak asetzea aukeran egongo da, gero, Skimales eta Manifa taldeen doinuak entzungo dira Santa Ana enparantzan. Hurrengo egunean, zapatuan, Magic karten lehiaketagaz helduko diote egunari; ondoren, berbarako jolasak, lehiaketak, magia-ikuskizuna eta herri-bazkaria egongo dira. Gauean, erromeriak dantzan ipiniko ditu plazara hurbilduko direnak. Amaitzeko, domekan, hiruko futbolean lehiatuko dira hainbat eta hainbat; horren ostean, paella onena aukeratzeko lehiaketa egingo dute, besteak beste.

Egitaraua:

Uztailak 21, barikua

  • 17:00 Txikigunea, Santa Ana enparantzan.
  • 19:00 Suziria botatzea, eta buruhandien kalejira.
  • 20:30 Sardina-jana.
  • 22:30 Kontzertuak: Skimales eta Manifa taldeenak.

Uztailak 22, zapatua

  • 10:00 Magic karten lehiaketa.
  • 11:00 Kuadrillentzako jarduerak.
  • 11:30 Txikigunea.
  • 14:30 Herri-bazkaria.
  • 17:00 Txikigunea, Marrazki eta Pintura Lehiaketa, eta kuadrillentzako jarduerak.
  • 18:00 Igel-tokan, lehiaketa.
  • 19:00 Magia-ikuskizuna.
  • 20:30 Saiheski-jana.
  • 22:30 Erromeria.

Uztailak 23, domeka

  • 11:00 Hiruko Futbolean, lehiaketa; Santa Ana enparantzan.
  • 11:30 Txikigunea.
  • 12:00 Kuadrillentzako jarduerak.
  • 13:00 Paella-lehiaketa.
  • 13:45 Euskal dantzen erakustaldia.
  • 17:00 Ur-jolasak.
  • 17:30 Bits-festa.
  • 18:30 Herri-kirolen erakustaldia.
  • 19:00 Karaokea.
  • 23:00 Kaleko zinema, Santa Ana enparantzan.

2017/07/21

Santa Ana Getxo

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa