Emakumezkoen mailan, bazirudien Brittany Dutton australiarrak lortuko zuela garaipena, kontuan izanda igerialdian bi minutu eta erdiko aldea lortu zuela Itziar Portero eta Mireia Arrillaga arerioekiko. Bizikleta saioak, igoera gogorrik eduki ez arren, zentzuz jokatzea eskatzen zuen. Prestatutako ibilbideak ez zuen ematen aukerarik arnas hartzeko, beti gora eta behera ekin behar zioten triatletek, eta hori gutxi balitz, haizeak ere parte hartu zuen kontuak zailtzeko. Baldintza horietan, eta saio ikaragarria egin ondoren, Arrillagak ia bi minutu murriztu zizkion Duttoni. Bizikletaz egindako lan txukunari, jarraipena eman zion Arrillagak korrikako azken zatian, eta hortaz, australiarra harrapatu eta gainditu zuen garaipen handia lortuz.
Gizonezko kategorian, tarteak txikiagoak izan ziren igerialdian, eta minutu bitan 20 triatleta inguru aurkeztu ziren aldaketa-gunean, bizikleta hartu eta bigarren saio gorabeheratsuari ekiteko. Hala, Egoitz Zalakain nabarmendu zen, eta hamalaugarren postuan hasi ondoren bizikleta saioa, lasterketa buruan ipini zen bigarren aldaketa-gunean, nahiz eta arazotxoren bat eduki triatloiko manilarraz. Lehia izugarria ikusteko aukera izan zen, Zalakainen eta Burnsen artean. Australiarrak erritmo bizia jarri zuen, eta Zalakain ahalegindu zen arren, ezin izan zion eutsi. Hortaz, Luke Burns, australiar gaztea agertu zen lehena helmugan.
Emakumezkoen sailpena
- Mireia Arrillaga, Garraitz kirol-taldea. 02.34.17
- Britanny Dutton, Qaz Squad. 02.35.37
- Estefanía Gómez Villanueva, independentea. 02.40.39
Gizonezkoen sailpena
- Luke Burns, Waz Squad. 02.13.10
- Egoitz Zalakain Erbiti, independentea. 02.14.28
- Gorka Bizkarra Etxegibel, ANB Urdaitri Motrivation. 02.17.39
