Politika  Getxo 2017-10-04 11:18

Getxoko GED: "Nahi duzu euskal herritarrok gure etorkizun politikoa gure kabuz eta aske erabakitzea?"

Datorren azaroaren 5ean egingo duten herri-galdeketaren itauna zein izango den jakinarazi zuen joan den domekan, urriaren 1ean, Getxoko Gure Esku Dagok. Hala, galdeketara deitutako udalerriko auzokide denek honi erantzun ahalko diote: "Nahi duzu euskal herritarrok gure etorkizun politikoa gure kabuz eta aske erabakitzea?".

Getxoko GED: "Nahi duzu euskal herritarrok gure etorkizun politikoa gure kabuz eta aske erabakitzea?"
Kataluniari elkartasuna adierazteko elkarretaratzean aurkeztu zuten galdera, urriaren 1ean. | Ikusi handiago | Argazki originala

Gure Esku Dagokoek jakinarazi dutenez, galdera horixe bera egingo dute Berangon eta Erandion ere. Itaun horren bidez, subjektu bat definitu gura dute, "kanpoko esku-hartzerik eta bere borondateaz haragoko mugarik onartzen ez duen subjektu bat, eta erabakitzeko eskubidearen aldeko borondatea agertuko dugu".

Urriaren 1ean aurkeztu zuen Getxoko Gure Esku Dago taldeak azaroaren 5ean egingo duen galdera, Kataluniari elkartasuna adierazteko elkarretaratzean bertan. "Kataluniako gizartea bizi duen egoera guztiz larria da. 'De facto' salbuespen egoera ezarri dute Espainiako Gobernuak eta estamentu judizialek. Eskubide zibil eta politikoak eta askatasun demokratikoak urratzen ari dira. Une hauetan demokrazia bera dago jokoan", deitoratu zuten Algortako Telletxe plazan batutakoek.

Euskal Herriak eta getxoztarrek beren etorkizuna erabakitzeko eskubidea dutela aldarrikatu zuten domekan, eta horretarako bozkatu gura dutela, "eta egingo dugu, azaroaren 5ean". Hala, elkarretaratzearen amaieran egun horretan Getxoko auzokide denei egingo zaien galdera aurkeztu zuten.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa