2017ko abenduaren 28an GetxoBerri aldizkarian agertutako informazioaren arabera, "aro demokratikoan" ez da babestutako etxebizitzarik eraiki Itzubaltzeta/Romo auzoan. Horren aurrean, Romo Plataformak adierazi du informazio hori ez datorrela bat errealitateagaz; izan ere, taldeak mota horretako 75 etxebizitza aurkitu ahal izan ditu auzo horretan: Gorbea kalea, 10; eta Errekagane kalea, 9, 11, 13 eta 15. Horiek denak 1983 eta 1986 urteen artean eraiki zituzten.
Horren denaren aurrean, Getxoko alkatearen jarrera gogor salatu du Romo Plataforma taldeak: "zorrotzagoak izan behar dira datu objektiboak aztertzerakoan". Era berean, pertsona nagusiak udalerriak bizi duen etxebizitzaren arazoaren erantzule direla adieraztea deitoratu du taldeak, "ez du inolako zentzurik". "Arduragabekeria da etxebizitzaren beharra eta ekipamendu sozialen beharren arteko debatea sortu gura izatea", gaineratu dute Itzubaltzeta/Romoko taldekoek. Hala, nagusientzako Eguneko Zentro baten beharra mahai-gaineratu du berriro Romo Plataformak, eta Getxoko Gobernu-taldeak horri erantzun behar diola adierazi dute, "gaur egungo egoera hobetuko duen soluzio bat aurkitu behar dute".