San Frantziskoko Munduko txapelketa horretan Zeelanda Berria txapeldunak eta Frantzia, Australia eta AEBko potentziek baino ez zuten amaitu Espainiaren gainetik, alegia, Bàrbara Plak eta Uribarri Barrutietak jokatu zuten selekzioaren gainetik. Pedro de Matiasek gidatutako taldea zerrendako bigarren selekzio europear onena izan zen, "berriz ere erakutsita denboraldi honetan egindako lan itzela", Basque Team fundazioak nabarmendu duenez.
Pla eta Barrutietaren taldeak munduko txapelketaren hasiera zail bati egin behar izan zion aurre, lehenengo neurketa Fijiren kontra izan baitzen baina ez zuten arazorik izan 12 eta 19 nagusitzeko. Hitzordu horretarako planteatu zuten helburua lortu zuten horrela: munduko zortzi selekzio onenen multzoan sartzea.
Final laurdenetan Australiako olinpiar txapeldunak izan zituzten aurrez aurre. Hasieratik maldan gora jarri zitzaien norgehiagoka; horren erakusle izan zen 0 eta 34ko behin betiko markagailua. Porrotaren ondoren helburua garbia zen: Munduko txapelketan bosgarren tokia bereganatzea, balentria mardula. Kanadaren aurka eman behar izan zuten lehen pausoa, eta sendotasunez eman zuten, kanadarrak 26 eta 14 menderatuta.
Beraz, azken oztopoa gainditu eta bosgarren postua erdiesteko, Irlanda azpiratu behar zuten. Bigarren zatirako neurketa irekita geratu zen eta dena emozioz beteriko azken txanpan erabaki zen. Defentsan indar guztia atera eta azken unera arte borrokan jarraitu behar izan zuten 7 eta 12 irabazteko.
