Getxoko Udalak adierazi du Hauteskunde Orokorretarako deialdia dela eta, ezin izango direla egin zentroaren irekiera ofizialeko ekintzak aurreikusitako egunetan. Hala, azaroan egingo dute inaugurazioa, lau egunez luzatuko dena. Zehazki, eraikinaren Ereaga Aretoan izango da ekitaldia, bertan, hainbat kultura elkarte, ikastetxe, abesbatza, tailer artistiko, dantza eta antzerki talde eta eskolek hartuko dute parte.
Udalak azaldu duenez, martxoaren 26an ekingo diote programazio arruntari. Lehen kontzertutik eta urtea amaitu arte, Getxoko kultur egutegiaren jarduera batzuk egingo dituzte antzokian. Emakumeak Musikan zikloa ekainaren 1 eta 2an, VIII. Street Culture Jaialdia ekainaren 8an, Getxoko Dantza Eguna ekainaren 14, 15 eta 16an, Getxoko Abesbatzen Eguna, ekainaren 16an, Getxo Txiki Kanta ekainaren 30ean, Jazzaldia uztailaren 3tik 7ra, Blues Jaialdia uztailaren 18tik 20ra, eta Folklorerena hilaren 22tik 24ra, besteak beste.
