Politika  Getxo 2019-02-25 12:49

Eduardo Andrade: “Lozorro jeltzaletik esnatu behar dira getxoztarrak, gure udalerria erreferente izan dadin berriro”

Kerman Santiago Alkorta

Eduardo Andradek, PPren hautagaia Getxoko alkatetzara, agerraldia egin zuen atzo Areetan. Autobus batean egin zuten bidea Ereagako hondartzatik, Erromo eta Algortatik igaroz. “Despierta Getxo” popularren goiburua ageri zen autobusaren magalean.

Alfonso Alonso, Raquel González eta Marisa Arrue, PPren presidenteak  EAEn, Bizkaian eta Getxon, hurrenez hurren, egon ziren Andradegaz batera domekan. Aparkatzeko zailtasunaz, kaleen segurasun ezaz eta gazteen emantzipazioaz egin zuen berba hautagaiak. 

Andrade kritiko agertu da EAJgaz hasieratik: “Euren ateak itxi behar izan duten komertzioak badaude Getxon, aparkatzeko arazoa dela eta. Horregatik aparkalekuak eraikitzea proposatzen dugu; Areetako geltokiaren ondoan, Gobelaurren, Ereagan eta Arrigunagako jaitsieran, besteak beste”.

“Kaleetako garbitasunak ere huts egin du, EAJ eta EHBilduren akordioari esker. Zaborrontzietako pedalak kendu zituzten eta kaleetako garbiketa murriztu zuten”, adierazi du hautagaiak. Gainera, udal-poliziak azken urteetan aurrera egin ez duela dio: “Udal-poliziak segurtasunarekin patruilatu behar ditu kaleak, delitugileak uxatzeko”.

Amaitzeko, jaiotza-tasak gora egitearen alde agertu da alkategaia: “Eskolako gastuetarako laguntzak bultzatu nahi ditugu. Gainera, etxeak eraikitzea ahalbidetu behar dugu, gazteen mesedeetan”.

40 urteren ondoren EAJren Udalak aldaketa behar duela uste du Andradek: “Lozorro jeltzaletik esnatu behar dira getxoztarrak, gure udalerria erreferente izan dadin berriro”.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa