"Berdintasuna ez emakumezkoen kontua bakarrik", esan zuen Carmen Díazek, Getxoko alkate izateko PSE-EEren hautagaiak, "den-denona baizik". Berdintasun eza salatu zuen, eta zehazki emakumezko pentsiodunen arazoaz berba egin zuen: "Getxo eder honetan, begiak zabalduz gero, agerian geratzen dira desberdintasunak; aldamenean dauzkagu emakume nagusiak, alargunak... oso pentsio pobreak jasotzen dituztenak, kasu askotan gauza askori uko egin behar dietenak". Batez beste, emakumeen pentsioak gizonenak baino 600 euro txikiagoak izaten direla azpimarratu zuen Díazek.
Teresa Laespada Bizkaiko Ahaldun Nagusi izateko hautagaiaren berbaldia izan zen luzeena. Berdintasunaren aldeko borroka PSEren muin-muinean dagoela adierazi zuen: "Horretarako sortu ginen". Krisiaren biktima handienetakoak emakumeak direla esan zuen Laespadak;"ez dut uste feminismorik dagoenik sozialismorik gabe, ezta alderantziz ere".
Laespadak nabarmendu egin zuen Uribe Kostan emakumezko alkategai asko dituela PSE-EEk. Hain zuen, eskualdeko hamar udalerrietatik bostetan aurkeztu dute emakumeren bat zerrendaren goiko aldean: Barrikan (Eugenia Gezuraga), Berangon (Nerea Jimenez), Getxon (Carmen Díaz), Sopelan (Maria Teresa Fernandez) eta Urdulizen (Saioa Solagaistua).