Talde ekologistak bidalitako ohar baten bidez ahotsa eman diote duela 15 urte landatutako lehenengo zuhaitzari: "Orain dela 15 urte Azkorrin landatu ninduten zenbait herritarrek; gizakiek hippy edo abraza arboles deitzen dituzuen horietako batzuek. Nire ostean, beste horrenbeste ere ikusi ditut landatzen: urkiak, ereinotzak, arteak,…Zoritxarrez ordea, leku guztietan ez daude hippy espezieko gizakiak arbolak landatzen".
Kolektiboak deitoratu duenez, daborduko zur-industria "handiagoa" da basoak baino gure mendietan. "Ekosistema oso baten babes liratekeen baso emankorrak eta jasangarriak izan beharrean, hostoz hosto, mendez mende ondutako lur aberatsak hamarkada gutxian txirotzen dituzten eta papera bilakatuko diren arbolaz josirik daude lurrok; gizakiak dirua deritzon eta batzuentzat soilik den papera, alegia", deitoratu dute ekologistek.
Lehenengo arbolari berriro hitza emanez, hurrengoa dio oharrak: "Horregatik, bertoko arbolak gutxi eta isolaturik egon gara orain arte; baina hori aldatuko dugu. Forondako arbolak borrokarako adorea kutsatu digu eta daborduko Uribe Kostako arbola erretxinduak antolatzen hasi gara. Amesten ditugun baso anitz eta askeak irabazteko lehen pausua izango da zapatu honetan Azkorriko pinudian egingo dugun zuhaitz landaketa. Ez ditugu zuhaitz ikoniko gehiago nahi, zuhaitzak zuhaitz artean galtzeko moduko basoak baizik".
