Matxoaren 13tik aurrera programatuta zeuden jarduera denak etorkizunean mantentzeko konpromisoa hartua duela adierazi du Getxoko Kultur Etxeak. Egunotan bizi dugun larrialdi egoeraren ondorioz, ekimen horiek denak bertan behera utzi behar izan dituzte; hala ere, etorkizunean aurreikusitako obrak berreskuratu eta berriro programatuko dituztela iragarri dute arduradunek, "aurrez hartutako baldintza berdinetan, 2020an edo 2021ean". Muxikebarri Antzokiaren programazioari dagokionez, azaldu dute ordainsarien %30a ordainduko dietela artistei ikuskizuna baino 90 egun lehenago.
Getxoko artistek sustatutako obrak
Udal arduradunek azpimarratu dutenez, udalerriko profesional ugarik parte hartu dute Getxoko kultur programazioaren osaketan. Horien artean hurrengoak nabarmendu dituzte:
- Ados teatroaren Lloviendo ranas. Garbi Losadak zuzendutako antzerkia da hori; martxoaren 21ean egitekoa zen, baina urrira arte atzeratu dute.
- Organik konpainiaren Sareak ikuskizuna, Natalia Monge artistak zuzendutakoa. Maiatzaren 16rako aurreikusita zegoen arren, konpainiak berak data berria zehazteko zain daude.
- Pablo Viar getxoztarrak zuzendutako Enigma Pessoa; urrirako aurreikusita dago.
- Denis Santacana artistaren Sharing Home dantza-ikuskizuna, urrirako aurreikusita.
Herritarren kreatibitatea sustatu guran
Getxoztarrek euren irudimena martxan jartzeko asmoz, Getxoko Balkoiak egitasmoa jarri du martxan Getxoko Kultur Etxeak. Zehaztu dutenez, iniziatiba hori udalerriko artistek balia dezakete garai latz hauetan "diru-sarrerak bermatu ahal izateko". Izan ere, ekimen horrek 600 euroko 10 sari banatzea aurreikusten du.
