Covid-19aren pandemia dela eta, Ohorezko Mailako eta Ohorezko B Mailako ligak amaitutzat eman ditu Espainiako Errugbi Federazioak. Ondorioz, Getxo Rugbyko lehenengo taldeak maila gorenera bueltatzea lortu du. "Denboraldi osoan zehar egindako lanagatik merezi dugun saria jaso dugu", adierazi dute getxoztarrek.
Bizi dugun ezohiko egoera dela eta, 2019-20ko denboraldia bertan behera uztea erabaki du Espainiako Errugbi Federazioak. Horren ondorioz, Getxo Rugby Ohorezko Mailara bueltatuko da, bigarren mailan puntu gehien duen taldea izateagatik; 7 puntuko aldea atera dio bigarrenari, Bizkaia Gernika taldeari. Kontrakoan, Hernani taldea kategoriaz jaitsiko da, maila goreneko ligan azkenengoa gelditu ondoren.
Maila gorenera igotzeko aukera izan zuten getxoztarrek iaz, baina azkenean ezinezkoa egin zitzaien Sevillako Ciencias taldearen kontra 26-12 galdu ondoren. Orain, aldiz, koronabirusak eragindako krisiak igoera hori aurreratu egin die, liga oparo bat bete ondoren.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
