Koronabirusa Uribe Kostan

"Aurtengo udako jaiak desberdin ikusi eta biziko ditugu"

Getxoko Andra Mariko aurtengo jaiak irailera atzeratzea erabaki zuen jai batzordeak joan den martxoan; horiek laster ospatzekoak ziren, baina, COVID-19aren pandemiaren ondorioz, erabaki hori hartu behar izan zuten arduradunek. Ildo horretatik, Getxoko Jai-Batzordeen Federakundeak azpimarratu du errealitate berri honetan jaiak "inoiz baino indar gehiagorekin" aurrera eraman gura dituztela, "betiere bizi dugun egoera aintzat hartuz eta horietara egokituz".

Udako jaiek udalerri osoaren kohesiorako betetzen duten papera nabarmendu gura izan du Getxoko Jai-Batzordeen Federazioak: "Jai herrikoiek herritarren arteko harremanak estutzen, auzoa egiten, babesguneak eraikitzen, tokiko merkataritza eta ostalaritza sustatzen laguntzen dute". Era berean, udalerriko elkarte eta eragileak ezagutzera emateko eta haien lana kalera eroateko baliagarriak direla azpimarratu dute jai-batzordeek, "baita egoera ahulean dauden bizilagunak zaintzen laguntzen digute, beste hamaika gauzen artean".

Hori dena kontutan hartuta, ospakizunok "galdu" behar ez direla aipatu dute; hori dela eta, gaur egun bizi dugun egoera kontuan hartuta, jaiok "ezberdinak" izango direla iragarri dute, "baina betiko legez, programa euskaldun, parte-hartzaile eta parekide bat egitea izango dute helburu, herritarron segurtasuna lehenetsita".

Herritarren osasuna lehenetsita

Federazioa osatzen duten jai-batzordeek udalerriko bizilagun denen osasuna bermatzea dute helburu. Horretarako, egoera berrietara egokitu eta lan egiteko prest daudela iragarri dute, "ezar daitezkeen neurriak hartuta, gure jaiak gure herriaren egitura soziokulturalaren eta ekonomikoaren parte direlako". Hala, Getxoko Udalagaz harremanetan jarri eta elkarlanean aritzeko prest daudela azpimarratu dute, bizilagunei laguntzeko beharrezko erabakietan laguntzeko: "Udalekoek ondo ezagutzen gaituzue, baita gure auzoetako jendeak, elkarteek, tabernek eta bertako merkataritzak ere".

Erlazionatuak

Andra Mariko jaiak, irailean

Getxo

Getxoko Andra Mariko Jai Batzordeak aurtengo jaiak atzeratzea erabaki du: "Guztiok ezagutzen dugun egoeragatik eta gure festa maiatzean denez, ardu...

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun