Getxoko Zirkuituaren 75. edizioa publikorik gabeko ekitaldia izateko beharrezko prebentzio-neurriak iragarri dituzte

CC BY SA-BIZKAINO

COVID-19ak eragindako osasun-krisiaren baldintzak medio, igande honetan, abuztuaren 2an, egingo den Getxoko Zirkuituaren 75. edizioa (Otxoa Anaiak Memoriala) publikorik gabeko ekitaldi bezala planteatuko da, zaleen nahiz txirrindularien osasuna ahal den neurrian zaintze aldera. Horretarako, Punta Galea Txirrindularitza Elkarteak, Getxoko Udalagaz elkarlanean, beharrezko neurriak hartuko ditu irteeran nahiz helmugan publikorik ez izateko; horrela, hesiak jarriko dira, eta soilik maskara jantzita joan ahal izango da, eta neurri higienikoak nahiz prebentzio-neurriak errespetatu beharko dituzte bai txirrindulariek, taldeek, batzorde antolatzaileak nahiz egiaztatutako prentsak.

Osasun eta kirol agintariakaz koordinatuta, Getxoko txirrindularitza-lasterketak plan bat diseinatu du kutsatzeko arriskua ahal den neurrian gutxiagotzeko, azken aste hauetan izandako berragertzeen aurrean neurri guztiak hartzea beharrezkoa den unean. Era horretan, Eusko Jaurlaritzako Osasun Departamentuak kirol-ekitaldiak antolatzeko gomendatutako segurtasun- eta higiene-neurri guztiak kontuan hartzeaz gain, sarien banaketa ateak itxita egingo da Getxoko udaletxeko osoko bilkuren aretoan.

Antolakuntzak lasterketa ETB1 eta eitb.eus bidez jarraitzea gomendatzen du, 11:30etik aurrera. Ordu horretan, irteera neutralizatua egingo da Bizkaia Zubian, eta 16:00ak aldera amaitzea aurreikusten da Getxoko epaitegien aurrean.       

Trafiko-neurriak

Lasterketa dela eta, datorren domekan, abuztuaren 2an, 11:00-17:30 tartean hurrengo neurriak egongo dira indarrean:

  • Debekatuta egongo da lasterketaren noranzkoan zirkulatzea.
  • Artatzako biribilgunean, Ereagako noranzkoko zirkulazioa 9:30etik aurrera etengo da, eta Ereagako hondartzarako, Kirol-porturako eta Portu Zaharrerako sarbidea 7:30etik aurrera.
  • Euskal Herria kalea: Trafikoa moztuta autobiarako noranzkoan.
  • Sarrikobaso kalea: Zirkulazioa debekatuta Algortako Etorbiderako noranzkoan (Algortarako sarbidea Bidezabaletik).
  • Erredentore kalea: Zirkulazioa debekatuta Sarrikobasorako noranzkoan.
  • Los Chopos etorbidea: Norabide bakarreko helbidea Plentzia-Bilbo.
  • Zugatzarte etorbidea: Zirkulazioa debekatuta Bilborako noranzkoan.

 

Euskotrenen autobusek ibilbidea aldatuko dute eta garraio publikoa erabiltzea gomendatzen da.

Erlazionatuak

Abuztuaren 2an egingo dute Getxoko Zirkuitua, osasun-segurtasunerako neurri eta guzti

Getxo

Getxoko txirrindularitza-lasterketa nagusiari 75. edizioa ezohiko kondizioetan egitea egokitu zaio. Antolatzaileak bertan behera uztekotan egon zir...

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun