Itzubaltzeta/Romoko Lope de Vega kaleko udal-eraikina (euskaltegi zaharra) okupatu zuten duela egun bi udalerriko hainbat gaztek. Azaldu dutenez, euren helburua izan da etxebizitza-proiektu bat garatzea bertan, denboragaz auzoko gazteei begirako proiektu integral bat eskaintzeko Itzubaltzeta III gaztetxeagaz batera. Hala ere, atzo, barikuan, eraikina berriro zigilatu zuen Ertzaintzak.
Ekintzaileek jakinarazi dutenez, auzoko beste hainbat gazteren laguntzagaz atzo udal-eraikinaren sarrailak irekitzera zihoazela Ertzaintza bertaratu zen atoan. "Barruan zeuden gazteak irten ezinik gelditu ziren, eta kanpoan zegoen bat geldiarazi zuten". Segituan, Bilboko Okupazio Mugimenduko abokatua gerturatu eta eraikina husteko agindu judiziala eskatu ei zien ertzainei. "Horren ondorioz, Keltse Eiguren Babes Zibileko zinegotzia agertu zen, eta agindurik ez zuela ikusita, epaitegietara joan zen salaketa jartzera", azaldu dute gazteek. Handik denbora gutxira, eraikinaren inguruko kale denak moztu eta Ertzaintza eraikinera sartu eta hura hustu zuen. Ekintzaileek deitoratu dutenez, hustuketa "ilegala" izan da, "ez dutelako inolako agindu judizialik izan horretarako". HIRUKA udal-arduradunakaz harremanetan jartzen saiatu da, baina oraindino ez du erantzunik jaso.
Polizi erasoak auzokideen kontra gaur Itzubaltzetan, @itzubaltzetaGA @inig_o @Erreharria1 pic.twitter.com/gCDWFzvz0S
— itzubaltzeta al-baskiya (@UgamboIaki) July 31, 2020
Salaketa eta identifikazio ugari
Udal-eraikina berriro zigilatzeaz gainera, 6 ekintzaile usurpazio eta kalteengatik salatu dituzte. Abokatua, aldiz, hainbatetan jipoitzeaz gainera, bere lana egiteagatik bi salaketa jaso dituela deitoratu dute gazteek. "Hori dena gutxi balitz, hainbat identifikazio, kolpe eta mehatxu jaso zituzten gure herrikideek", adierazi dute ekintzaileek.
Egon daitezkeen isunei aurre egiteko kanpaina jarri dute martxan ekintzaileek. Hala, isunik edo kolpatuak izan direnek eurakaz harremanetan jartzeko email bat jarri dute martxan: epaiketaitzubaltzeta@gmail.com. "Salaketa jarri nahi izanez gero helbide hori erabili gurekin kontaktuan jartzeko. Salaketa jarri ahal izateko argazkiak zein mediku parteak beharrezkoak izango dira", azaldu dute.
Desalojo bortitza gaur arrastin Itzubaltzetako euskaltegi zaharrean, inbatsio poliziala berriro eta auzokide eta abokatu erasotuak. Utzi gaztedia pakean!! pic.twitter.com/tcsotjavxP
— itzubaltzeta al-baskiya (@UgamboIaki) July 31, 2020
