Espetxeratutako Altsasuko gazteen aldeko kamiseta bat eramateagatik Granada futbol taldetik kanporatutako Unai Etxebarria atezain getxoztarrari elkartasuna adierazteko adierazpen instituzional bat onartu du Getxoko Bozeramaileen Batzordeak, EH Bilduren proposamenez. Koalizio abertzaleaz gainera, adierazpenak EAJ eta Elkarrekin Podemos taldeen babesa izan du; PP eta PSE kontra agertu dira.
Adierazpen askatasuna titulupean, adierazpenak hurrengoa dio: “Ezin uler daiteke profesional bat, kasu honetan kirolaria, kaleratua izatea bere adierazpen askatasunerako eskubidearen erabilera egiteagatik. Kaleratze hau eskubide urraketa larritzat jotzen du Udal honek, bai eskubide zibilen planoan zein, kasu honetan, lan eskubideen planoan. Horrenbestez, edozein pertsonaren adierazpen askatasunerako eskubidea beti errespetatua izan dadin galdegiten dugu”.
EH Bilduk positiboki baloratu du gaur lortutako akordioa. Abuztuaren 30ean egindako kontzentrazioan Getxoko auzokideek ere euren babes eta elkartasuna adierazi zioten Algortako futbol jokalariari, Gu ere bai plataformak egindako deiari erantzunez.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
