GetxoExpress film laburren jaialdiak 2.600 euro baino gehiago banatuko ditu saritan

2017ko GetxoExpress lehiaketaren irabazleak. © GETXOKO UDALA

Urriaren 23tik 25era bitartean egingo dute aurten GetxoExpress film laburren lehiaketa; horretan parte hartzeko 25 plazak izen-emate epea zabaldu eta 48 orduan amaitu ziren. Aurten, gainera, GetxoExpressPRO ekimena gehituko diote programazioari, ikus-entzunezkoen profesionalei begirakoa, hilaren 21ean eta 22an. Berritasun gisa, programazio osoa ikusi ahal izango da bai aurrez aurre bai streaming bidez, lehiaketaren web orriaren bidez. Jarduera guztiak doakoak izango dira.

Lehiaketa urriaren 23an (barikua) hasiko da, 18:00etan. Bertan parte-hartzaileei edizio honetako gaia emango diete. Une horretatik aurrera, 25 taldeek 42 ordu izango dituzte haien ideiak landu, grabatu eta film laburrak ekoizteko. Filmen proiekzioak eta sarien banaketa ekitaldia urriaren 25ean izango dira, 18:00etatik aurrera, Areetako Andrés Isasi Musika Eskolan, eserleku mugatuakaz. Jaialdiak 2.600 euro baino gehiago banatuko ditu irabazleen artean.

GetxoExpressPRO

GetxoExpress PRO ekimenean, urriaren 21ean 18:00etan, Inge Sáezek parte hartuko du. LinkedInen aplikatutako marketin-estrategietan aditua da eta ikus-entzunezkoen eta kulturaren sektoreko enpresen eta profesionalen ikusgarritasuna hobetzeko tailerra emango du Linkedin-en bidez. Ondoren, 19:00etan, zenbait film labur proiektatuko dira; proiektu horietako talde batzuk bertan izango dira, eta, gero, Borja Crespok moderatutako mahai-inguru batean entzun ahal izango dira.

Urriaren 22an, 11:00etan, Moriarti Produkzioak ekoiztetxeko kideek zine zuzendaritza eta talde-lanaren inguruko masterclass bat eskainiko dute. Lan egiteko moduez eta filmaketetan eta ikus-entzunezko proiektuetan talde-lanak duen garrantziaz arituko dira.

GetxoExpress Pro programaren edozein jardueratan Romo Kultur Etxean aurrez aurre parte hartzeko, interesdunek hurrengo helbidean eman beharko dute izena: https://getxoexpress.com/gtx-pro

Epaimahaia eta babesleak

GetxoExpressen epai-mahaikideak honako hauek izango dira: Ramón Barea, aktorea; Iratxe Fresneda, zinema zuzendaria eta Gorka Aguirre, efektu berezietako makillajea.

Erlazionatuak

Daborduko izena eman daiteke GetxoExpress film laburren lehiaketan

Getxo

Urriaren 23tik 25era bitartean egingo dute aurten GetxoExpress film laburren lehiaketa. Bosgarren edizio honetan ere, parte-hartzaileek 42 ...

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun