Berrogei urte bete ziren iaz, 2020an, ALBE, Algortako Bertsolari Eskola, sortu zenetik. 1980. urtea izan zuen lehenengoa, eta geroztik lan handia egin du Algortako zein eskualdeko bertsolaritza hauspotzen. Urtemuga hori gogoratzeko, eta egindako ibilbidea goraipatzeko, saio berezia prestatu du ETB1eko Hitzetik Hortzera saioak zapatu honetarako; Jone Uria eta Unai Mendiburu albekideak arituko dira horretan.
2020 urtea arraroa izan da oso, arazoak arazo, gorabeheratsua. Kontuak horrela, besteak beste, ALBEk ezin izan zuen iaz gura izan duen bezala bere 40. urteurrena ospatu. Hala ere, geldirik gelditu ez, eta urterako aurreikusitako saio gehienak bideratzea lortu zuen, egoerara egokitzeko moldaketak eginda bada ere.
Urtez urte, askotarikoak dira ALBEk Uribe Kostan antolatu izan dituen, eta espero du antolatzen segitu ahal izango dituen, bertso-saioen zerrenda, hala nola Bertso Maratoia, Bertso Jaialdi Mundiala eta Balkoitik Balkoira. Horiez gainera, beste hainbat ekimen bultzatu dituzte bertso-eskolatik: Balendin Enbeita Bertsopaper Sariketa, ALBE Gala, ALBE Eguna eta Abra Saria, besteak beste.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
