Mikel Bildosola Swim Camp Getxo Igeriketa taldeko kideak Europako errekor berria ezarri du 35-39 urte arteko 100 metro libreko frogan, 50,01-eko denbora eginda. Hala, orain hilabete Bildosolak berak Galdakaoko Master Sarian ezarri zuen aurreko markari 12 ehuneko kendu dizkio oraingoan, Castellon de la Planan egindako Espainiako Txapelketako Masterrean. Gainera, 100 Estiloetako Espainiako marka berria ere ezarri du getxoztarrak: 57,78: aurreko denbora segundo erdian hobetuta.
Orokorrean, Swim Camp Getxoko talde guztiak egindako lana goraipatzekoa izan da txapelketa horretan; besteak beste, Mikel Iriondok 50 bizkar, 200 bizkar eta 100 estiloen 40-44 adin tartean beste hiru urrezko domina eskuratu zituen; Francisco Berreteaga 100 tximeletan urrea eta 100 estiloetan brontzea lortu zuen, 45-49 adin tartean; Javier Etxebestek urre bat gehitu zuen 60-64 adin tartean 50 libreetan; eta Ibaik Elorriagak denboraldiko markak hobetu zituen.