Migrazioetan adituak diren pertsonek osatutako Harrera Planaren aurkezpena egin zuen Getxoko Udalak joan den barikuan, hilaren 5ean, Romo Kultur Etxean. Elkarrekin Podemos taldeak prozesu hori egitea eskartu du, baita baloratu ere diagnostikoa modu zorrotzean eta hainbat gizarte-eragileren parte-hartzeagaz egin izana ere. Dena dela, Carolina Uribe zinegotziak deitoratu du Getxoko Helduen Hezkuntzarako Eskolaren (HHE) parte-hartzearen falta, erabiltzaileen eta profesionalen agente aktibo delakoan –ikus HIRUKA 172. zenbakia–. Era berean, koalizio ezkertiarrak salatu du Udalak abandonatuta duela zerbitzu hori, egoera ahulenean dauden migratzaileakaz zuzenean lan egiten den lekua izan arren.
Podemosek, Ezker Anitza-IUk eta Equo-Berdeakek osatutako koalizioak 12 proposamen zabal jaso ditu, eta etorkizuneko plan horrek "pertsona migratuak eskubide osoko herritarrak izan beharko liratekeela" kontuan hartzea espero du. Horregatik, beren proposamenakaz iradoki gura izan dute erakundeetatik informazioa nola ematen den baino haratago joan beharra dagoela, eta kontuan hartu behar dela, halaber, "Udaleko herritarrentzako arreta-egitura eta zerbitzu guztiek migrazioen zeharkako ikuspegi bat hartzea, pentsatua. Haien espezifikotasuna aitortuz, ahaztu gabe askotariko kolektiboak direla eta herritar gisa tratatu behar direla ".
Horrez gainera, egindako lana asko baloratzen duten arren, Uribek esan du zain daudela diagnostikoan adierazitako jarduera-ildoak "migratuak gizarteratzeko politika publiko eraginkor eta zehatzez betetzea eta kontsigna hutsetan ez geratzea, haien egoera administratiboa oztopo izan ez dadin eskubideak eskuratzeko orduan".
