Sei urtez itxita egon ondoren, gaur abiatu dituzte Usategi Kafetegia birgaitzeko lanak

Usategi Kafetegia, gaur egun. © GETXOKO UDALA

Algortako Usategi Kafetegia azpiegituraren inguratzailea eta egokitzapen funtzionala birgaitzeko lanak abiatuko dituzte gaur, astelehenean. Obrak egiteko epea lau hilabetekoa izango da, gutxi gorabehera; beraz, datorren urtarrilaren hasierarako amaitzea espero dute arduradunek. Esleipenaren zenbatekoa 291.270 eurokoa da.

Fase berri horretan, eraikinaren fatxadak, estalkiak eta zoruak berrituko dituzte, eta irtenbide berriak proiektatuko ere, suteen aurkako babesari, zaratari, egiturazko eta erabilerako segurtasunari, osasungarritasunari eta abarri buruzko eskakizun teknikoak betetzeko. Estalki lau bat sortuko da, aire zabaleko terraza gisa erabiltzeko modukoa. Gainera, eraikinaren barruko irisgarritasuna hobetzeko espazioa egokitzea aurreikusi dute, batez ere ekialdeko sarbideari dagokionez; izan ere, bertan kokatuko da igogailu bertikalerako sarbidea. Igogailuaren lanak uztailean amaitu ziren (martxan egon liteke, baina segurtasunez ez da erabiliko lanak egiten diren bitartean) .

Lanak hasteko, desmuntatze selektiboa egingo dute, eta eraikinaren barrualdea hustu. Fase horren ondoren, kafetegia ustiatzeko lizitazioa egingo dute, eta pertsona edo enpresa emakidadunak lokalaren barrualdea egokitu beharko du bere proiektuagaz.

Lanen eragina

Lanak direla eta, astelehenetik aurrera, Genaratxu eta Usategi parkearen arteko oinezkoentzako bidea moztuta geratuko da. Era berean, parkearen ekialdean, obra-eremua itxiko da, eta makineriaren sarbidea eta materialen pilaketa Gazteluzarra kaletik egingo dira. Obraren sarbidearen ondoan edukiontzien gune bat egongo da, eta, beraz, hondakinak gaika biltzeko edukiontzien bateriara bideratutako espazioak aldi baterako doitu beharko dira. Era berean, dibertsitate funtzionala duten pertsonentzat erreserbatutako aparkaleku-plazak doitu beharko dira.

 

Erlazionatuak

Usategi kafetegia itxi ostean ekin dio Getxoko Udalak agiri berriak egiteari

Getxo

Algortako Usategi parkean dagoen kafetegiaren ustiapen baimena hilaren 12an amaitu zen. Ostalaritza-zerbitzua ustiatu dutenek giltzak bueltatu ditu...

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun