Irailaren hasieran Azkorri inguruan jazotako auto-pilaketei erantzun guran, Azkorri Bizirik taldeak auzolana egin zuen joan den domekan, hilaren 12an. Azaldu dutenez, dozenaka bat lagun bildu ziren ibilgailuen masifikazioari eta naturagunearen inbasioari muga jartzeko. Horretarako, Gorrondatxe-Azkorri hondartzako sarbidean dagoen zelaiaren ertzean egurrezko hesolak jarri dituzte, horretarako sarbidea mugatzeko asmoz.
Talde ekologistako kideek azaldu dutenez, egun bi lehenago, barikuan, Getxoko Udalak harri handiak jarri zituen zelaiaren sarreran, eta, zapatutik aurrera, Udaltzaingoak isunak ipintzen hasi zen galtzadaren alde bietan eta Goienetxen aparkatuta zeuden ibilgailu guztiei, marra horia gainditzeagatik. "Gidariak aparkatzeko mugarik ez izatera ohitu direnean, isunak jarri dira", deitoratu dute auzokideek.
Udalak bat-batean erantzun du presioaren aurrean, plangintzarik eta koherentziarik gabe. Azkorri-Andra Mariko espazio osoan ingurumena babesteko eta hobetzeko plan integral bat behar da, mugikortasun jasangarriko plan bat jasoko duena. (5/8) pic.twitter.com/ojTrCwc38y
— Azkorri Bizirik (@AzkorriB) September 17, 2021
Neurriok salatu ditu Azkorri Bizirik taldeak, "plangintzarik eta koherentziarik gabe" egin direlakoan. Izan ere, taldearen ustez, Azkorri-Andra Mariko eremu osoan ingurumena babesteko eta hobetzeko plan integral bat behar da, "mugikortasun jasangarriko plan bat jasoko duena".
Ekologistek diotenez, hori guztia azaldu diote Udalari "behin eta berriz, proposamen zehatzekin", baina aldeko erantzunik jaso ez dutela deitoratu dute.
Besteak beste, ibilgailu partikularreko mugikortasunaren alternatiba iraunkorrak jarri behar direla aldarrikatu dute, bizikleta eta autobusa bultzatuta, inguruko aparkalekuak aprobetxatuta, doako lantzaderak eta Getxobizi udal-zerbitzuaren bidez elkartuta, besteak beste.
